ປີ 1975 ພາຍຫຼັງປົດປ່ອຍ ທຸກຂົງເຂດວຽກງານແມ່ນຍັງຂາດແຄນພະນັກງານ ເພື່ອປະກອບເຂົ້າໃນການສ້າງສາ ພັດທະນາປະເທດຊາດ; ຂົງເຂດສາທາລະນະສຸກ ກໍ່ແມ່ນຂົງເຂດວຽກງານໜຶ່ງທີ່ເຮັດໜ້າທີ່ບໍລິການສຸຂະພາບ ໃຫ້ແກ່ປະຊາຊົນບັນດາເຜົ່າ. ໃນທົ່ວປະເທດມີໂຮງຮຽນສ້າງແພດຈໍານວນບໍ່ຫຼາຍ ເງື່ອນໄຂໃນການໄປສຶກສາຮໍາຮຽນກໍ່ຫຍຸ້ງຍາກ ແຕ່ຄວາມຕ້ອງການຂອງສັງຄົມມີຫຼາຍ ສະນັ້ນ ພະແນກສາທາລະນະສຸກແຂວງອຸດົມໄຊ ຈິ່ງສົມທົບກັບພາກສ່ວນທີ່ກ່ຽວຂ້ອງສ້າງຕັ້ງໂຮງຮຽນສ້າງແພດຊັ້ນຕົ້ນຂື້ນທີ່ແຂວງອຸດົມໄຊ ໃນເວລານັ້ນ ການຮຽນແມ່ນອີງໃສ່ປະສົບການ ການຝຶກປະຕິບັດຕົວຈິງເປັນຫຼັກ, ບໍ່ມີຫຼັກສູດການຮຽນທີ່ເປັນລະບົບ, ຜູ້ເຂົ້າຮຽນ ຈົບພຽງຊັ້ນປະຖົມ ກໍ່ສາມາດເຂົ້າຮຽນໄດ້ ຫຼັກສູດການຮຽນ ແຕກຕ່າງກັນໃນແຕ່ລະໄລຍະ ເຊິ່ງມີທັງໄລຍະຮຽນ 01 ປີ, 01 ປີ 06 ເດືອນ ແລະ 02 ປີ ເນັ້ນຈໍານວນດ້ານປະລິມານ ເພື່ອຕອບສະໜອງບຸກຄະລະກອນໃຫ້ໂຮງໝໍແຂວງ ແລະ ໂຮງໝໍເມືອງພາຍໃນແຂວງອຸດົມໄຊ. ແຕ່ປີ 1975-1994 ໂຮງຮຽນແຫ່ງດັ່ງກ່າວໄດ້ສ້າງ 02 ສາຂາຄື: ແພດຊັ້ນຕົ້ນ ແລະ ການຢາຊັ້ນຕົ້ນ ສາມາດສ້າງໄດ້ 20 ລຸ້ນ ມີຜູ້ສໍາເລັດການຮຽນທັງໝົດ 835 ຄົນ ໃນນັ້ນ ແພດຊັ້ນຕົ້ນ 782 ຄົນ ແລະ ການຢາຊັ້ນຕົ້ນ 53 ຄົນ. ມາຮອດຊ່ວງປີ 1995-1999 ແມ່ນໄດ້ຢຸດການສ້າງນັກຮຽນແພດຊົ່ວຄາວ. ຮອດ ປີ 2000 ກະຊວງສາທາລະນະສຸກມີນະໂຍບາຍຫຂະຫຍາຍສະຖານທີ່ການບໍລິການສຸຂະພາບໃຫ້ທົ່ວເຖິງ ຈິ່ງເຫັນໄດ້ຄວາມສໍາຄັນ ແລະ ຈໍາເປັນໃນການປະກອບບຸກຄະລະກອນເຂົ້າໃນສະຖານທີ່ບໍລິການທຸກແຫ່ງ ແລະ ອີງໃສ່ ສະພາບຈຸດພິເສດ ທີ່ຕັ້ງພູມສັນຖານ ທີ່ເໝາະສົມ ຈິ່ງໄດ້ອານຸຍາດໃຫ້ແຂວງອຸດົມໄຊ ສ້າງສະຖາບັນການສຶກສາສາທາລະນະສຸກຂຶ້ນ ໂດຍຫັນຈາກໂຮງຮຽນແພດຊັ້ນຕົ້ນ ມາເປັນໂຮງຮຽນສາທາລະນະສຸກອຸດົມໄຊ ຈົນເຖິງປະຈຸບັນ.
ພາຍຫຼັງກະກຽມຄວາມພ້ອມທັງດ້ານບຸກຄະລະກອນຄູ, ພື້ນຖານໂຄງລ່າງຫໍພັກ, ຫ້ອງຮຽນ, ຫ້ອງການພະນັກ ງານຄູອາຈານ, ຫຼັກສູດການຮຽນ, ອຸປະກອນການຮຽນ-ການສອນ, ປື້ມຕໍາລາການຮຽນ ແລະ ນິຕິກໍາອື່ນໆ ຄົບຖ້ວນແລ້ວ ຕົ້ນປີ 2003 ໄດ້ເປີດການຮຽນ-ການສອນ ຫຼັກສູດການແພດ ຮສຂ ຊັ້ນຕົ້ນສົກຮຽນ 2002-2003 ຂຶ້ນຢ່າງເປັນທາງການ ສ້າງນັກຮຽນໄດ້ 03 ລຸ້ນ ມີຜູ້ສໍາເລັດການສຶກສາ 125 ຄົນ ຍິງ 48 ຄົນ.
ຮອດສົກຮຽນ 2006-2007 ໄດ້ເປີດການຮຽນ-ການສອນ ຫຼັກສູດ ຊັ້ນກາງ ແລະ ຫຼັກສູດແພດບ້ານລະດັບຕົ້ນຈຳນວນທັງໝົດ 06 ສາຂາ 04 ຫຼັກສູດ ມີນັກສຶກສາທີ່ສໍາເລັດການສຶກສາທັງໝົດ ຈໍານວນ 1,011 ຄົນ ຍິງ 564 ຄົນ ໃນນີ້ມີແຕ່ລະຫຼັກສູດດັ່ງນີ້:
- ຫຼັກສູດ ພະຍາບານສາດເຕັກນິກ ຊັ້ນກາງ ສາຍກົງ ຈຳນວນ 09 ລຸ້ນ ມີນັກສຶກສາທັງໝົດ 536 ຄົນ, ຍິງ 323 ຄົນ.
- ຫຼັກສູດ ພະຍາບານ ສາດເຕັກນິກ ສາຍຕໍ່ເນື່ອງ ຈຳນວນ 03 ລຸ້ນ ມີນັກສຶກສາທັງໝົດ 69 ຄົນ ຍິງ 49 ຄົນ.
- ຫຼັກສູດ ແພດຊັ້ນກາງ ຮສຂ ມີຈຳນວນທັງໝົດ 03 ລຸ້ນ ມີນັກສຶກສາທັງໝົດ 105 ຄົນ ຍິງ 43 ຄົນ.
- ຫຼັກສູດ ຜະດຸງຄັນ ຊຸມຊົນ ຊັ້ນກາງ ສາຍກົງ ຈຳນວນ 04 ລຸ້ນ ມີນັກສຶກສາທັງໝົດ 77 ຄົນ ຍິງ 77 ຄົນ.
- ຫຼັກສູດ ຜະດຸງຄັນ ຊຸມຊົນ ສາຍຕໍ່ເນື່ອງ ຈຳນວນ 03 ລຸ້ນ ມີນັກສຶກສາທັງໝົດ 66 ຄົນ ຍິງ 52 ຄົນ.
- ຫຼັກສູດ ແພດບ້ານ ຊັ້ນຕົ້ນ ມີຈຳນວນທັງໝົດ 03 ລຸ້ນ ມີນັກສຶກສາທັງໝົດ 86 ຄົນ ຍິງ 39 ຄົນ.
ນັບແຕ່ປີ 2015 ເຖິງປະຈຸບັນໂຮງຮຽນສາທາລະນະສຸກອຸດົມໄຊ ໄດ້ຮັບການຕົກລົງຈາກກະຊວງສາທາລະນະສຸກ ແລະ ກະຊວງສຶກສາທິການ ແລະ ກິລາ ອານຸຍາດໃຫ້ເປີດການຮຽນ-ການສອນຫຼັກສູດຊັ້ນສູງ 02 ສາຂາ 4 ຫຼັກສູດຄື: ສາຂາສາຂາພະຍາບານ, ຜະດຸງຄັນ ສາຍກົງ ແລະ ສາຍຕໍ່ເນື່ອງ ຈຳນວນທັງໝົດ 615 ຄົນ ຍິງ 406 ຄົນ.
>> ນັກສຶກສາທີ່ສຳເລັດການສຶກສາແລ້ວ ມີຈໍານວນທັງໝົດ 328 ຄົນ ຍິງ 226 ຄົນ ລາຍລະອຽດຄື:
- ຫຼັກສູດ ພະຍາບານ ຊັ້ນສູງ ສາຍກົງ ຈຳນວນ 03 ລຸ້ນ ມີນັກສຶກສາທັງໝົດ 162 ຄົນ ຍິງ 105 ຄົນ.
- ຫຼັກສູດ ພະຍາບານ ຊັ້ນສູງ ສາຍຕໍ່ເນື່ອງ ຈຳນວນ 03 ລຸ້ນ ມີນັກສຶກສາທັງໝົດ 89 ຄົນ ຍິງ 44 ຄົນ.
- ຫຼັກສູດ ຜະດຸງຄັນ ຊັ້ນສູງ ສາຍກົງ ຈຳນວນ 03 ລຸ້ນ ມີນັກສຶກສາທັງໝົດ 77 ຄົນ ຍິງ 77 ຄົນ.