ອີງຕາມແຜນພັດທະນາເສດຖະກິດ-ສັງຄົມ ແຫ່ງຊາດ

ອີງຕາມແຜນພັດທະນາເສດຖະກິດ-ສັງຄົມ ແຫ່ງຊາດ ກໍຄືແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ຂອງແຂວງອຸດົມໄຊ ແລະ ອີງຕາມພາລະບົດບາດ ໃນການຈັດຕັ້ງ ແລະ ການເຄື່ອນໄຫວຂອງພະແນກສາທາລະນະສຸກແຂວງ ໃນການຂະຫຍາຍ ລະບົບຕາໜ່າງສາທາລະນະສຸກ ໃຫ້ຂະຫຍາຍປົກຄຸມເຂົ້າເຖິງເຂດຫ່າງໄກສອກຫຼີກ ແລະ ພໍ່ແມ່ປະຊາຊົນໄດ້ເຂົ້າເຖິງຂໍ້ມູນການບໍລິການດ້ານສາທາລະນສຸກຢ່າງທົ່ວເຖິງ. ວຽກງານສາທາລະນະສຸກ ເປັນວຽກໜຶ່ງທີ່ມີບົດບາດສຳຄັນຕໍ່ການພັດທະນາເສດຖະກິດ-ສັງຄົມ ໂດຍສະເພາະແມ່ນວຽກງານໂຄສະນາ-ປະຊາສຳພັນ ແລະ ເຜີຍແຜ່ຂໍ້ມູນຂ່າວສານ ການໃຫ້ຄວາມຮູ້ ໃນການປ້ອງການ, ຄວບຄຸມ, ແກ້ໄຂ ແລະກຽມຄວາມພ້ອມຮອບດ້ານຕ້ານການລະບາດຂອງພະຍາດ ໂຄວິດ 19 ຂອງຄະນະສະເພາະກິດຂັ້ນແຂວງ, ວຽກງານອະນາໄມ ແລະ ສົ່ງເສີມສຸຂພາບ, ວຽກງານຄວບຄຸມພະຍາດຕິດຕໍ່, ວຽກງານການປິ່ນປົວ ແລະ ຟື້ນຟູໜ້າທີ່ການ, ວຽກງານອາຫານ ແລະ ຢາ ແລະ ວຽກງານການສຶກສາດ້ານສາທາລະນະສຸກ, ແຕ່ການຈັດຕັ້ງຜັນຂະຫຍາຍວຽກງານເຫຼົ່ານັ້ນເຂົ້າສູ່ລວງເລິກ ແລະ ທົ່ວເຖິງນັ້ນ ການເລືອກສື່ກາງ (Mass Media) ທີ່ເໝາະສົມ ແລະ ເປັນສື່ຫຼັກທາງການຂອງແຂວງ ໃນການຕິດຕໍ່ສື່ສານ, ການແລກປ່ຽນຂໍ້ມູນຂ່າວສານ, ໂຄສະນາ-ປະຊາສຳພັນ, ການເຜີຍແຜ່ບັນດານິຕິກຳ, ລະບຽບການຕ່າງໆ ທີ່ກ່ຽວຂ້ອງກັບວຽກງານດ້ານສາທາລະນະສຸກ ໃນການໂຄສະນາ-ເຜີຍແຜ່ຂໍ້ມູນຂ່າວສານວຽກງານດ້ານສາທາລະນະສຸກ ໂດຍສະເພາະແມ່ນຊ່ວງໄລຍະການລະບາດພະຍາດໂຄວິດ-19 ນີ້ ໃຫ້ປະຊາຊົນ ແລະ ສັງຄົມໄດ້ຮັບຮູ້ຂໍ້ມູນຂ່າວສານທີ່ຖືກຕ້ອງຈາກທາງການໄດ້ຢ່າງສະດວກວ່ອງໄວ, ທົ່ວເຖິງ ແລະ ສາມາດເຂົ້າເຖິງຕະຫຼອດເວລານັ້ນ ເປັນສິ່ງທີ່ຈຳເປັນ ແລະ ສຳຄັນ.