ໃນຕອນບ່າຍຂອງວັນທີ 23 ກໍລະກົດ ປີ 2021 ທີ່ຜ່ານມາ, ພະແນກສາທາລະນະສຸກແຂວງອຸດົມໄຊ ໄດ້ເປີດກອງປະຊຸມເປີດນຳໃຊ້ເວັບໄຊ້ ພະແນກສາທາລະນະສຸກ ທີ່ຫ້ອງປະຊຸມພະແນກສາທາລະນະສຸກ ໃຫ້ກຽດເປັນປະທານຄັ້ງນີ້ໂດຍ: ທ່ານ ຫຸມພັນ ອິນທະມຸງຄຸນ ຫົວໜ້າພະແນກສາທາລະນະສຸກແຂວງ, ທ່ານ ນາງ ປິ່ນຄຳ ອຸ່ນລະຄອນ ຮອງຫົວໜ້າພະແນກ ເຕັກໂນໂລຊີ ແລະ ການສື່ສານແຂວງອຸດົມໄຊ, ມີຜູ້ເຂົ້າຮ່ວມທັງໝົດ 27 ທ່ານ, ຍິງ 10 ທ່ານ, ມີພະນັກງານໃນຂະແໜງການຕ່າງໆພາຍໃນພະແນກສາທາ, ໂຮງຮຽນ, ໂຮງໝໍ ແລະ ແຂກເຊີນມາຈາກພາກສ່ວນອື່ນໆ ເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມດັ່ງກ່າວແມ່ນ ກອງປະຊຸມພິທີເປີດນຳໃຊ້ເວັບໄຊ (sttp://odx-pho.gov.la) ເປັນເວັບໄຊ ຢ່າງເປັນທາງການ ຂອງພະແນກສາທາລະນະສຸກແຂວງ ເພື່ອກະຈາຍຂ່າວສານ, ການເຄື່ອນໄຫວກິດຈະກຳຕ່າງໆຂອງວຽກງານຂະແໜງການສາທາລະນະສຸກເວົ້າລວມ, ເວົ້າສະເພາະແມ່ນແຂວງອຸດົມໄຊ ໃຫ້ສັງຄົມໄດ້ຮັບຮູ້ຢ່າງທົ່ວເຖີງ ແລະທັນເວລາ. ໃນກອງປະຊຸມດັ່ງກ່າວໄດ້ຜ່ານບົດລາຍງານໂຄງການສ້າງເວັບໄຊ ພະແນກສາທາລະນະສຸກແຂວງອຸດົມໄຊ, ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຜູ້ຮັບຜິດຊອບຄຸ້ມຄອງເວັບໄຊ, ສາທິດໃຫ້ເບິ່ງໜ້າຕ່າງຂອງເວັບໄຊ ຫຼັງຈາກນັ້ນກໍໄດ້ສະເໜີໃຫ້ອົງປະຊຸມໄດ້ປະກອບຄຳຄິດຄຳເຫັນໃສ່ ເພື່ອປັບປຸງແກ້ໄຂໃຫ້ຖືກຕ້ອງ, ສອດຄ່ອງ, ແທດເໝາະກັບສະພາບໂຕຈິງ ແລະ ເປັນເອກະພາບກັນທາງດ້ານໂຄງສ້າງ, ເນື້ອໃນ, ໜ້າຕ່າງ, ສີສັນ ແລະ ອື່ນຂອງເວັບໄຊ. ໂຄງການນີ້ແມ່ນໄດ້ຮັບທຶນສະໜັບສະໜູນຈາກ: ໂຄງການ ຜ-ບສພ. ແລະ ອອກແບບລະບົບໂດຍ: ທ່ານ ພູຄຳ ມະນີວັນ ວິຊາການຂະແໜງໄອຊີທີ ພະແນກເຕັກໂນໂລຊີ ແລະ ການສື່ສານແຂວງ, (ຜູ່ຮັບຜິດຊອບໂຄງການ ທ່ານ ຊາຍພອນ ແກ້ວສຸກະເສີມ ຮອງຂະແໜງແຜນການ ແລະ ການຮ່ວມມື ພະແນກສາທາລະນະສຸກແຂວງ),
ໃນຄະນະດຽວກັນນັ້ນ ທ່ານ ນາງ ປິ່ນຄຳ ອຸ່ນລະຄອນ ຮອງຫົວໜ້າພະແນກ ເຕັກໂນໂລຊີ ແລະການສື່ສານແຂວງ ກໍໄດ້ມີຄຳເຫັນຕໍ່ກອງປະຊຸມ ເຊິ່ງເພີ່ນໄດ້ຍົກໃຫ້ເຫັນເຖີງ ບົດບາດຄວາມສ່ຳຄັນຂອງເຕັກໂນໂລຊີຂໍ້ມູນຂ່າວສານ, ລະບົບສື່ອອນລາຍຕ່າງໆ ສາມາດໂຄສະນາ, ເຜີຍແຜ່ຂໍ້ມູນໄດ້ຢ່າງສະດວກ, ວ່ອງໄວ, ກວ້າງຂວາງ ແລະ ເພື່ອເປັນການຊຸກຍູ້, ສົ່ງເສີມ ການຫັນເປັນທັນສະໄໝ ລະບົບບໍລິການຂອງລັດດ້ວຍດີຕີຕອນ ແລະ ການນຳໃຊ້ເຕັກໂນໂລຊີຂໍ້ມູນຂ່າວສານ ເຂົ້າໃນການບໍລິຫານຈັດການວຽກງານໃນອົງການຈັດຕັ້ງພາກລັດ ເພື່ອຍົກລະດັບປະສິດທິພາບການບໍລິຫານຈັດການ ແລະ ການຄຸ້ມຄອງລັດ ໃຫ້ມີຄວາມສະດວກ, ວ່ອງໄວ, ປະຢັດ, ມີຄວາມປອດໄພ, ໂປ່ງໃສ. ເພື່ອກຽມຄວາມພ້ອມກ້າວໄປສູ່ການຫັນເປັນລັດຖະບານດີຈີຕອນ (ທັນສະໄໝ), ເສດຖະກິດດີຈີຕອນ ແລະ ສັງຄົມດີຈີຕອນ ແລະຫັນເຂົ້າສູ່ ອຸດສາຫະກຳ 4.0 ເທື່ອລະກ້າວ. ພ້ອມນັ້ນ, ກໍໄດ້ຍັງໄດ້ຮຽກຮ້ອງໃຫ້ພະແນກສາທາລະນະສຸກແຂວງ ນຳໃຊ້ເວັບໄຊຂອງຕົນ ເຜີຍແຜ່ຂໍ້ມູນຂ່າວສານຕ່າງດ້ານຂະແໜງການສາທາລະນະສຸກຢ່າງມີປະສິດທິພາບ, ມີປະສິດທິຜົນ ແລະມີຄວາມໜ້າເຊື່ອຖື ໃຫ້ແກ່ສັ່ງໄດ້ຮັບຮູ້ຢ່າງກວ້າງຂວາງ.
ໃນຕອນທ້າຍຂອງກອງປະຊຸມ ທ່ານ ຫຸມພັນ ອິນທະມຸງຄຸນ ຫົວໜ້າພະແນກສາທາລະນະສຸກແຂວງ ກໍໄດ້ມີຄຳຄິດຄຳເຫັນເພື່ອ ແນ່ໃສ່ເຮັດໃຫ້ເວັບໄຊຂອງພະແນກສາທາລະນະສຸກ ເປັນກະບອກສຽງອັນໃໝ່, ເປັນກະດານຂ່າວທີ່ຄວາມໜ້າເຊື່ອຖື ເພື່ອກະຈາຍຂ່າວໃນຂົງເຂດຂອງສະທາລະນະສຸກແຂວງອຸດົມໄຊ ໃຫ້ສັງຄົມໄດ້ຮັບຮູ້ຢ່າງກວ້າງຂວາງນັ້ນ ເພີ່ນໄດ້ເນັ້ນໜັກບາງດ້ານດັ່ງນີ້:
- ໃຫ້ນັກງານພະແນກສາທາລະນະສຸກພວກເຮົາຈະຕ້ອງໄດ້ເອົາໃຈໃສ່ໂຄສະນາເຜີຍແຜ່ໃຫ້ສັງຄົມໄດ້ຮັບຮູ້ທີ່ຢູ່ຂອງເວັບໄຊ.
- ເອົາໃຈໃສ່ໂຄສະນາເຊີນຊວນໃຫ້ສັງຄົມເຂົ້າມານຳໃຊ້ ຫຼື ສຶກສາຂໍ້ມູນທາງດ້ານຂະແໜງການສາທາເປັນຕົ້ນແມ່ນຂໍ້ມູນດ້ານໂຄວິດ, ຂໍ້ມູນການໃຫ້ວັກຊິນ, ຂໍ້ມູນສຸກຂະສຶກສາ ແລະ ອື່ນໆ.
- ຄະນະຮັບຜິດຊອບທີ່ຖືກແຕ່ງຕັ້ງຈະຕ້ອງໄດ້ເອົາໃຈໃສ່ປຶກສາຫາລືໃນ ປັບປຸງທາງດ້ານໂຄງສ້າງ, ປັບປຸງຂໍ້ມູນສ່ວນອື່ນໆທີ່ຍັງບໍ່ທັນຄົບຖ້ວນລົງ ແລະ ສະໜອງຂໍ້ມູນຂ່າວສານຕ່າງໆໃຫ້ທັນກັບສະພາບການ ແລະເປັນປົກກະຕິ.
ພ້ອມກັນນັ້ນ, ກໍໄດ້ກ່າວເປີດນຳໃຊ້ເວັບໄຊ ຂອງພະແນກສາທາລະນະສຸກຢ່າງເປັນທາງການ ແລະ ປິດກອງປະຊຸມ.