ຂະແໜງຈັດຕັ້ງ ແລະ ພະນັກງານ ສ້າງຄວາມເຂັ້ມແຂງວຽກກໍ່ສ້າງພະນັກງານໃຫ້ແກ່ຂັ້ນທ້ອງຖິ່ນ

ຂະແໜງຈັດຕັ້ງ ແລະ ພະນັກງານ ພະແນກສາທາລະນະສຸກ ແລະ ກົມຈັດຕັ້ງ ແລະ ພະນັກງານ ກະຊວງສາທາລະນະສຸກ ໄດ້ຈັດຝຶກອົບຮົມວຽກງານສ້າງແຜນບັນຈຸ-ຊັບຊ້ອນ ພະນັກງານ ໃຫ້ແກ່ຂັ້ນແຂວງ ແລະ ຂັ້ນເມືອງ ໃນລະຫວ່າງວັນທີ 29-30 ສິງຫາ 2024 ເພື່ອສ້າງຄວາມເຂັມແຂງໃຫ້ແກ່ຂັ້ນທ້ອງຖິ່ນໃນການ ຈັດສັນ, ວາງແຜນກໍ່ສ້າງ ແລະ ບັນຈຸຊັບຊ້ອນພະນັກງານໃນແຕ່ລະຂັ້ນ ເພື່ອຍົກລະດັບໃນດ້ານວິຊາສະເພາະໃນແຕ່ລະໄລຍະໃຫ້ຖືກຕ້ອງ ແລະ ສອດຄ່ອງກັບສະພາບຕົວຈິງ ໃນກອງປະຊຸມຝຶກອົບຮົມດັ່ງກ່າວໄດ້ໃຫ້ກຽດເປັນປະທານໂດຍ ທ່ານ ດຣ ຫຸມພັນ ອິນທະມຸງຄຸນ ຫົວໜ້າພະແນກສາທາລະນະສຸກແຂວງອຸດົມໄຊ, ມີຄູຝຶກຈາກກົມຈັດຕັ້ງກະຊວງສາທາລະນະສຸກ, ພະນັກງານ ແລະ ນັກສຳມະນາກອນຈາກຂັ້ນແຂວງ; ພະແນກສາທາ, ໂຮງໝໍແຂວງ, ໂຮງຮຽນສາທາ ແລະ ຫ້ອງການສາທາລະນະສຸກເມືອງ 7 ເຂົ້າຮ່ວມທັງໝົດ: 44 ທ່ານ, ຍິງ 17 ທ່ານ. ເນື້ອໃນທີ່ອົບຮົມມີລາຍລະອຽດດັ່ງນີ້:

ແນະນຳວິທີການນຳຂໍ້ມູນອອກຈາກລະບົບ PIMSv2;
ກວດຂໍ້ມູນ ແລະ ປັບປຸງຂໍ້ມູນໃນລະບົບ PIMSv2;
ກວດສອບ ແລະ ສັງລວມຂໍ້ມູນສັນຍາຈ້າງ ແລະ ອາສາສະໝັກ;
ປ້ອນຂໍ້ມູນເຂົ້າເຄື່ອງມືສ້າງແຜນຄວາມຕ້ອງການເຂົ້າໃນລະບົບ;
ແນະນຳວິທີການສ້າງແຜນບັນຈຸ-ຊັບຊ້ອນ ພະນັກງານຢູ່ສຸກສາລາ ທີ່ຍັງຂາດ ແພດປິ່ນປົວ, ພະຍາບານ ແລະ ຜະດົງຄັນ;
ຈັດບູລິມະສິດກຳນົດບັນຈຸຊັບຊ້ອນ ແລະ ຝຶກອົບຮົມພະນັກງານເຂົ້າໃນເຄື່ອງມືລະບົບ;
ສະເໜີເປົ້າໝາຍ ແລະ ວິທີການຈັດຕັ້ງປະຕິບັດຕົວຊີ້ວັດ ແລະ ງົບປະມານໂຄງການ HANSA2.

ໃນກອງປະຊຸມຝຶກອົບຮົມນັກສຳມະນາກອນ ແລະ ຄູຝຶກ ກໍໄດ້ເອົາໃຈໃສ່ແລກປ່ຽນບົດຮຽນນຳກັນຢ່າງແຂງແຮງ ແລະ ເປັນຂະບວນຟົດຟຶ້ນ ເຮັດໃຫ້ເນື້ອຈິດໃຈຂອງກອງປະຊຸມຝຶກອົບຮົມມີເນື້ອໃນສົມບູນ ແລະ ໄດ້ຮັບຜົນຕາມຄາດໝາຍ; ໃນຕອນທ້າຍຂອງກອງປະຊຸມຝຶກອົບຮົມທ່ານປະທານກໍໄດ້ມີຄວາມເປັນຫ່ວງເປັນໄຍ ແລະ ມີຄຳເຫັນເນັ້ນໜັກຕໍ່ກອງປະຊຸມຄື: ໃຫ້ນັກສຳມະນາກອນທຸກພາກສ່ວນນຳເອົາ ບັນດາເນື້ອໃນບົດຮຽນຕ່າງໆຈາກຄູຝຶກ ມາຜັນຂະຫຍາຍ ແລະ ຈັດຕັ້ງປະຕິບັດຕົວຈິງໃນຂົງເຂດຂອງຕົນໃຫ້ຖືກຕ້ອງ, ຈັດສັນເປົ້າໝາຍກໍ່ສ້າງພະນັກງານໃນປີ 2025 ໃນຂັ້ນຕົນໂດຍອີງໃສ່ຄວາມຍືນຍົງ ແລະ ໃຫ້ມີພ້ອມໃນການຈັດຕັ້ງປະຕິບັດວຽກງານ; ເພື່ອຍົກລະດັບ ແລະ ກໍ່ສ້າງພະນັກງານສືບທອດ ໃນທຸກຂັ້ນໃຫ້ມີຄວາມເຂັມແຂງ ແລະ ມີຄວາມຮູ້ຄວາມສາມາດທ້າງດ້ານວິຊາສະເພາະເພື່ອບັນຈຸຊັບຊ້ອນເຂົ້າໃນຕຳແໜ່ງງານຢ່າງເໝາະສົມ ແລະ ສິ່ງສຳຄັນແມ່ນ ເພື່ອເຮັດໃຫ້ການເຄື່ອນໄຫວວຽກງານສາທາລະນະສຸກໃນແຕ່ຂັ້ນ: ຂັ້ນແຂວງ, ຂັ້ນເມືອງ, ສຸກສາລາ ໃນໄລຍະໃໝ່ມີຄວາມແຂງແຮງ ກໍຄືການບໍລິການປິ່ນປົວສຸຂະພາບ ຂອງພໍ່ແມ່ປະຊາຊົນ ໄດ້ຢ່າງມີຄຸນນະພາບ ແລະ ເປັນທີ່ໄວ້ວາງໃຈຂອງສັງຄົມ.

ກອງປະຊຸມໄດ້ດຳເນີນໄປເປັນເວລາ 2 ວັນເຕັມ ແລະ ສິນສຸດລົງ ດ້ວຍຜົນສຳເລັດອັນຈົບງາມ.