ຫົວໜ້າຄະນະສະເພາະກິດຂັ້ນແຂວງ ລົງເຄື່ອນໄຫວ ຕິດຕາມ ແລະຊຸກຍູ້ ເຈົ້າໜ້າປະຈຳຢູ່ຈຸດກວດຊາຍແດນ ເຂົ້າ-ອອກ ແຂວງອຸດົມໄຊ – ແຂວງຫຼວງພະບາງ ແລະ ອຸດົມໄຊ – ຜົ້ງສາລີ
ທ້າຍອາທິດທີ່ຜ່ານມານີ້ ທ່ານ ສົມຈິດ ປັນຍາສັກ ຮອງເຈົ້າແຂວງ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ຂັ້ນແຂວງ ແລະ ກອງເລຂາຄະນະສະເພາະກິດ ໄດ້ລົງ ຕິດຕາມ ແລະ ຊຸກຍູ້ ຈຸດກວດຄົນ ເຂົ້າ-ອອກ ເມືອງ ລະຫວ່າງ ຊາຍແດນ ແຂວງອຸດົມໄຊ – ແຂວງຫຼວງພະບາງ ຈຸດຫຼັກ 44 ເສັ້ນທາງເລກທີ 13 ເໜືອ ແລະ ຈຸດຫຼັກ 50 ເສັ້ນທາງ 2 E ລະຫວ່າງ ຊາຍແດນ ແຂວງອຸດົມໄຊ – ແຂວງຜົ້ງສາລີ. ໃນການລົງເຄື່ອນໄຫວ ຕິດຕາມ ແລະ ຊຸກຍູ້ ຢູ່ສອງຈຸດດັ່ງກ່າວ ແມ່ນເພື່ອລົງຢ້ຽນຢາມເບີ່ງສະພາບ ການກວດກາ ເວນຍາມ ການ ເຂົ້າ-ອອກ ເມືອງ ຂອງພົນລະເມືອງລາວ ແລະ ຕ່າງປະເທດ ທີ່ເດີນທາງຜ່ານແຂວງອຸດົມໄຊ ໃນຊ່ວງປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ພ້ອມທັງໄດ້ນໍາເອົາເຄື່ອງຂອງຈໍານວນໜຶ່ງໄປມອບເປັນກໍາລັງໃຈໃຫ້ເຈົ້າໜ້າທີ່ສະເພາະກິດປະຈໍາຢູ່ແຕ່ລະຈຸດກວດ. ໂອກາດດຽວກັນ ທ່ານຮອງເຈົ້າແຂວງ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19ຂັ້ນແຂວງ ໄດ້ສະແດງຄວາມຍ້ອງຍໍຊົມເຊີຍເຈົ້າໜ້າທີ່ໄດ້ເອົາໃຈໃສ່ເຄື່ອນໄຫວເວນຍາມ ປະຕິບັດໜ້າທີ່ວຽກງານດ້ວຍຄວາມອົດທົນ, ຕັ້ງໃຈບຸກບືນສູ້ຊົນ, ມີຄວາມຮັບຜິດຊອບສູງ. ພ້ອມທັງໃຫ້ທິດຊີ້ນໍາໃນການຈັດຕັ້ງປະຕິບັດການ ກວດກາ ເວນຍາມ ຕ້ອງມີຄວາມເຂັ້ມງວດປະຕິບັດຕາມມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຄົນເຂົ້າມາຕ້ອງມີເອກະສານຢັ້ງຢືນຄົບຖ້ວນ ຄື: ບັດປະຈໍາຕົວ, ໃບຢັ້ງຢືນການສັກຢາວັກຊີນ, ໃບອະນຸຍາດຈາກຄະນະສະເພາະກິດ ຕົ້ນທາງ – ປາຍທາງ, ຖ້າເປັນຄົນຕ່າງປະເທດຕ້ອງມີພາດສະປອດ, ວີຊາເຂົ້າ ສປປ ລາວ ແລະ ພະຫະນະ ຕ້ອງມີເອກະສານຄົບຖ້ວນ ມີໃບອະນຸຍາດຈາກພະແນກ ຍທຂ ແລະອື່ນໆ.
ພາບ-ຂ່າວ: ໄມພອນ
ກວດແກ້: ອ່ຽງຄຳ ວິລະສັກ
